ភ្នំពេញ៖ រដ្ឋបាលរាជធានីភ្នំពេញសម្រេចបើកចរាចរស្ពានអាកាសចោមចៅមួយខ្សែដែលភ្ជាប់ពីមហាវិថីចោមចៅឆ្ពោះទៅផ្លូវជាតិលេខ៣ នៅម៉ោង៨ព្រឹក ថ្ងៃទី៣១ ខែធ្នូ ឆ្នាំ២០២១ ដើម្បីសម្រួលដល់ការធ្វើចរាចរ។
ក្នុងសេចក្ដីជូនដំណឹងចុះថ្ងៃទី៣០ ខែធ្នូ ឆ្នាំ២០២១ រដ្ឋបាលរាជធានីភ្នំពេញបានឱ្យដឹងថា ស្ពានកំណោងថ្មីនេះមានប្រវែង២០០ម៉ែត្រ ទទឹង៥,២៥ម៉ែត្រ ជាស្ពានឯកទិសធ្វើចរាចរពីមហាវិថីចោមចៅឡើងលើស្ពានអាកាសកំណោង រួចបត់ឆ្វេងភ្ជាប់ចរាចរឆ្ពោះទៅផ្លូវជាតិលេខ៣ ក្នុងភូមិសាស្ត្រខណ្ឌពោធិ៍សែនជ័យ។
គិតត្រឹមថ្ងៃទី៣០ ខែធ្នូ ឆ្នាំ២០២១នេះ ការដ្ឋានសាងសង់ស្ពានអាកាសចោមចៅបានសម្រេចលទ្ធផល៩២% ដែលគ្រោងនឹងបញ្ចប់នៅខែមីនា ឆ្នាំ២០២២ខាងមុខ ហើយមកដល់ពេលនេះបានដាក់ឱ្យប្រើប្រាស់ជាបណ្ដោះអាសន្នស្ពានអាកាស និងផ្លូវក្រោមដីបានចំនួន៥ខ្សែក្នុងចំណោម៨ខ្សែនៃគម្រោង៕
